大埔吐露港公路鬼騎警

大埔吐露港公路鬼騎警

記唔記得幾年前，曾經有個聽眾打上電臺一個鬼故節目，好驚咁話俾個鬼差佬截查。其實大埔呢個鬼差佬已經o向公路出現o左好耐，好多車都俾佢查過。好似Leo就曾經接二連三俾鬼差佬抄牌，亦因此先可以逃過撞車一劫。

Leo屋企係大埔，不過每日佢都要出九龍返夜校，好在一夠十八歲屋企就撥o左架車俾佢用，所以幾夜返都冇所謂。今日係A-level考試前夕，一班同學放學之後就去宵夜Farewell。回程時Leo仲車埋幾個同樣住o係新界o既同學返屋企，Leo揀o左大埔吐露港公路返屋企。當車行到差唔多到中文大學o既一段時，Leo突然見到有一個騎警o既電筒照住自己，所以第一時間將架車停埋一邊。

「阿Sir，乜事呀？」

「前面有危險，小心o的開車，唔好開咁快！記住呀！」

「知道啦！唔該阿Sir！」

Leo心諗：「個阿Sir又幾好人喎！仲以為佢想捉我開快車！」諗o下諗o下架車已經到o左大埔廣福村，但係Leo乜都見唔到。「又話有危險，乜都冇！」

第二日，Leo大約係同一時間再經過公路同一段路，竟然又見到有個警察；跟住佢即刻心諗，「唔係又撞見呢個差佬呀？咁邪！」當架車差唔多經過個差佬附近時，又俾佢用電筒照住示意駛埋一邊。

「阿Sir，又係你呀？又乜事呀？」

「前面有危險，小心o的開車，唔好開咁快！記住呀！」

「阿Sir，我尋日都見過你啦！你都係咁講啦！但係我去到前面乜都見唔到o番！」

「總之前面有危險，小心o的開車，唔好開咁快！記住呀！」

「究竟前面有乜危險？仲有點解你日日都係呢度截車o架？」Leo好奇心驅使下膽粗粗問阿Sir，不過阿Sir冇理佢就走冲。

Leo於是再開車，不過一路上都再見唔到個差人或者有任何交通意外。「個阿Sir係咪玩我呀？次次都截住我叫我小心！跟住就唔知竄o左去邊！」

第三日，Leo又要經過吐露港公路返屋企，差唔多到前兩日見到差佬o個段路時，突然諗起之前見過o個個差佬，「唔知今日又會唔會見到o個個差人呢？都係開慢o的；都唔知係咪有心裝我、想抄我牌！」

不過，今次Leo過曬段路都見唔到佢，轉眼間又差唔多到大埔。正當架車就到大埔時，前面距離公路一個交叉路口有三架車突然撞埋一堆，仲發出好大聲「砰！」一聲，Leo即刻踩腳掣剎停架車！而佢架車同發生意外o個三架車隻係相隔唔夠一呎！

跟住Leo就即刻落車睇o下有乜幫到手。佢見到其中一架車入面o既司機同乘客已經傷到血肉模糊，奄奄一息。突然間聽到「嗚～嗚～」警車聲，心諗一定係前兩日個警察到，呢個時候果然有一架警察電單車經過佢身邊，不過架車冇停到，而且當個警察擰個樣過o黎時，Leo認得呢個差人就係前兩日不斷警告自己小心乍車o個個差佬。

究竟係咪之前個差人知道Leo可能會發生交通意外，所以至不斷提醒佢？如果佢唔係咁提醒自己，撞車o個個可能就係Leo。